Новости
Меѓународен ден за сеќавање на Холокаустот
- Детали
- Објавено: Среда, 31 Јануари 2018 12:11
- Посети: 9095
И Ромите биле жртви на нацистичкиот режим
Светот уште еднаш се потсети на жртвите на Холокаустот, одбележувајќи го 27 јануари – Меѓународниот ден на сеќавање на Холокаустот. Во Холокаустот умреле многу Евреи, Роми, Словени. Според некои непотврдени информации, бројката на загинати Роми изнесува меѓу 200.000 и 500.000 лица.
По овој повод, Министерството за надворешни работи на Република Македонија, минатата недела, организираше комеморативна церемонија и изложба на тема „Изгубениот свет на сефардските Евреи од Западниот Балкан“. Министерката за образование Рената Дескоска во обраќањето потсети дека Македонија презема многубројни активности за одбележување на овој датум.
„Нашиот ангажман, покрај Холокаустот, ги вклучува и борбата против антисемитизмот, негирањето и искривоколчувањето на Холокаустот, дискриминација по многу основи, говорот на омраза и другите форми на кршење на човековите права кои, за жал, сé почесто се присутни во Европа и пошироко. Фокусот на нашите заложби го ставаме на младите и темите на сеќавањето и одбележувањето на најзначајните датуми, образованието и истражувањето“, рече Дескоска.
Во Скопје, пред 7 години, беше отворен Меморијалниот центар на жртвите на холокаустот, во знак на сеќавање на депортираните македонски Евреи.
Генералното собрание на Обединетите Нации, пред 12 години, одлучи 27 јануари да биде денот кога ќе се сеќаваме на жртвите на холокаустот, датумот кога пред 68 години престана да функционира нацистичкиот концентарциски логор Аушвиц. На овој ден се повикува на почит и спомен на жртвите на холокаустот и на изработка и реализација на образовни програми за ваквите настани никогаш да не се повторат.
За германските нацисти Ромската нација беше рационално инфериорна во однос на останатите нации и поради тоа, многу Роми од околината на Полска, Русија, Германија и други држави се депортирани во концентрациони логори. Повеќе експерти се согласуваат дека во тоа време околу 80% од ромската популација во Европа била убиена, можеби достигнувајќи и бројки од 750.000 до 1.5 милион лица.
