![](/images/oratorstvo-1.jpg)
Ромаверзитас - со поддршка за развој кон лични и колективни еднакви пристапи и можности
Ораторски настапи на студентите на Ромаверзитас „Ромскиот народ - МИНАТО, СЕГАШНОСТ,ИДНИНА“
- Детали
- Објавено: Петок, 05 Април 2019 15:23
- Посети: 1438
![](/images/oratorstvo-1.jpg)
Реалното секојдневие и предизвиците на Ромите беа дел од темите кои, вчеравечер, ги говореа ораторите на темата „Ромскиот народ - МИНАТО, СЕГАШНОСТ, ИДНИНА“. Ораторската вечер ја организираше здружението на граѓани „Ромаверзитас“ по повод 8-ми Април – Меѓународниот ден на Ромите.
Проектниот менаџер на ЗГ „Ромаверзитас“, Силхан Саитов вели: „Овогодинешните ораторски настапи испраќаат неколку пораки. Прво, еднакво општество за сите значи еднаквост во спроведувањето на Охридскиот Рамковен договор, односно унапредување на состојбите со вработувањето и употребата на ромскиот јазик, како и прифаќање на позитивните политики како јавни политики. Второ, да се прекине веднаш со негативните вести за Ромите во медиумите и да се зајакне борбата против семејното насилството и насилството врз жената. Последно, да прекине поданичкото однесување, да ја поддржиме и да се приклучиме кон критичката маса за да се бориме да се појави новото лидерство кај ромската заедница.“
Учесниците говореа на различни теми повразни со секојдневието и со предизвиците на ромската заедница и останатите граѓани. Ариф Адеми говореше за „Едно општество за сите.. ама во Германија!“, а Фатима Сали се осврна на „За медиумцките работи“. Нивниот колега Семран Сулејман јавно го постави прашањето „Дали ќе изумреме?“, додека Цвета Ангелова говореше за „Книгата во рака и напред во борба“. Студентот Руфат Демиров го искажа својот став на темата „Доста бевме идиоти!“, додека Алмира Фасљии се осврна на темата „Дали тунелот има крај?“.
Сите учесници – оратори добија благодарници за нивната интерпретација, а менторот на ораторите Марко Кртолица доби благодарница за неговиот ангажман. Исто така, на самиот настан по повод 8ми Април, претставници на Ромаверзитас доделија признанија на дипломираните Роми во прв циклус на студии во 2018 година, награди и признанија за најдобри студенти Роми во Ромаверзитас во 2017/18 и сертификати за учество на работилници на студенти и алумнисти Роми.
Здружението на граѓани „Ромаверзитас“ е препознатлив лидер за поддршка и развој на активни и квалитетни високообразовани Роми, кои ја застапуваат ромската заедница и се активно вклучени во процесите на креирање и донесување на јавни политики на локално и национално ниво.
Поддршката за реализација на овој настан е обезбедена во рамки на проектот „Ромаверзитас – со поддршка за развој кон лични и колективни еднакви пристапи и можности“, финансиски поддржан од Ромскиот образовен фонд (РЕФ) од Будимпешта.